Шамалды-Сайда бензовоз менен кичи автобус сүзүшүп, 1 адам каза болду

Жалал-Абад облусундагы Шамалды-Сай шаарчасында бензовоз менен кичи автобус сүзүшүп, бир адам каза болду. Бул тууралуу Жалал-Абад Жол кыймылынын коопсуздугун камсыздоо бөлүмүнүн басма сөз кызматынан маалымдады.

Маалыматка ылайык, жол кырсыгы бүгүн, 30-апрелде эртең мененки саат 7:30 чамасында Ош-Бишкек унаа жолунун 473-чакырымында орун алган.

"Mercedes-Benz 711 (Gigant) кичи автобусу жүргүнчүлөрү менен Бишкекти көздөй бара жатып, бензовоз менен сүзүшүп кеткен. Кырсыктын кесепетинен кичи автобустун бир жүргүнчүсү каза болуп, айдоочу жана 3 жүргүнчү жаракат алган. Ошондой эле бензовоздун айдоочусу дагы жаракат алып, ооруканага жеткирилген. Учурда кайсы тарап күнөөлүү экени белгисиз. Жабыркагандардын аты-жөнү такталууда", - дейт маалымат кызматы.