Депутат: "Уран казууга каршы митингдердин артында кайсы мамлекеттер турат деген сөздөр айтылууда"

Бүгүн, 2-майда Жогорку Кеңештин жыйынында депутат Руслан Казакбаев уран казууга каршы митингдердин артында кайсы мамлекеттер турат деген сөздөр айтылып жатканын билдирди.

"Уранга каршы митингдин артында кайсы мамлекеттер турат деген сөздөр айтылууда. Бул тууралуу Улуттук коопсуздук мамлекеттик комитетинин маалыматы барбы?" - деп сурады депутат.

Улуттук коопсуздук мамлекеттик комитетинин төрагасынын орун басары Мирлан Тургунбеков бул боюнча маалыматы жоктугун айтты.

Казакбаев уран казуу боюнча УКМКнын ою кандай экенин сурады. Мирлан Тургунбеков бул курч маселе экенин айтып, тийиштүү мекемелер чечим чыгара турганын, элдин ден соолугу маанилүү экенин белгиледи. Депутат "уран казууга каршысызбы?" деп бир канча жолу сурагандан кийин УКМКнын төрагасынын орун басары каршы экенин билдирди.

Учурда жыйында Кызыл-Омпол уран кени маселеси боюнча өкмөттүн маалыматы угулуп жатат.