Алайда жол кырсыгы катталып, 2 адам каза болду. Дагы 4 адам ооруканада

Ош облусунун Алай районунда жол кырсыгы катталып, 2 адам каза болду. Дагы 4 адам ооруканада жатат. Бул тууралуу Ош ОИИБинин басма сөз кызматы маалымдады.

Маалыматка ылайык, окуя кечээ, 3-майда саат 11:30 чамасында Таш-Короо айыл аймагында орун алган. Анда ДЭУ Матиз менен Хонда Одиссей үлгүсүндөгү унаалар сүзүшкөн.

"ДЭУ Матиз унаасынын айдоочусу аял киши болгон. Кырсыктын кесепетинен аял башкарган унаанын ичиндеги 1937-жылы туулган Р.А. жана 1952-жылы туулган Т.А. аттуу эки жаран каза тапкан. Ал эми Матиздин айдоочусу жана Хонда Одиссей унаасындагы 3 адам денесинен ар түрдүү жаракаттарды алып, ооруканага жеткирилген", - дейт маалымат кызматынан.

Аталган факт Кылмыштардын жана жоруктардын бирдиктүү тизмесине катталып, сотко чейинки териштирүү иштери башталды. Тийиштүү экспертизалар дагы дайындалды.