Билим берүү министринин орун басары: "Өлкө боюнча кооптуу абалдагы 193 мектеп бар"

Өлкө боюнча кооптуу абалдагы 193 мектеп бар. Бул тууралуу бүгүн, 6-майда Жогорку Кеңештин Бюджет жана финансы боюнча комитетинин жыйынында билим берүү жана илим министринин орун басары Надира Жусупбекова билдирди.

Комитет жыйынында ден соолугунун мүмкүнчүлүгү чектелген балдарды кадимки бала бакчаларда, мектептерде окутууга багытталган мыйзам долбоору каралып жатат.

Депутат Зиядин Жамалдинов биринчи кезекте кооптуу абалдагы мектептер тууралуу көйгөйдү чечип алуу зарылдыгын айтты.

"Авариялык абалдагы мектептердин иштери башталбай турат. Биринчи кезекте ошол мектептердин оңдоп-түзөө иштерин бүтүрүү керек. Мугалимдердин айлык-маянасы көтөрүлүшү шарт. Аталган мыйзам долбоору ишке ашса, 1 миллиард сом коротулат деп жатасыздар. Алгач мектеп көйгөйлөрүн чечип алалы. Жер титирөө болсо кооптуу абалдагы мектептер куласа, окуучуларга зыяны тиет. 2024-2027-жылдары тышкы карызды төлөөнүн чокусуна келет экенбиз. Мыйзамдарды 2024-жылы күчүнө кирет деп кабыл ала берген болбойт", - деди Жамалдинов.

Депутат Дастан Бекешев Конституция боюнча ар бир бала билим алууга укуктуу экенин айтып, ден соолугунун мүмкүнчүлүгү чектелген балдарды кадимки мектептерге окутууну акырындан баштоо керектигин белгиледи. Ошону менен катар эле мыйзам долбоору ишке ашса 1 миллиард сом керектелет деп айтпаганын эскертти.