"Уран кенин казуу зыян алып келсе жабылсын, негизи пайда бере турган болсо өнүктүрүп, гүлдөтсө болот" дейт коомдук талкуунун катышуучусу

"Уран кенин казуу зыян алып келсе жабылсын, негизи пайда бере турган болсо өнүктүрүп, гүлдөтсө болот" деп бүгүн, 7-майда Жогорку Кеңеште өтүп жаткан коомдук талкуунун катышуучусу Нурахмат Мирбеков билдирди.

Ал Жогорку Кеңештин депутаттарына кайрылып кетти. "Интернетте уран кенин казууга каршы митингдер өтүп жатканы жарыяланып жатат. Көпчүлүгүбүз туристтер келбей кала турганын айтып жатабыз. Митинг тууралуу 15 мамлекетке 15 тилде которулуп жатат. Уран кенин казуу зыян деп жатсак эс алуучулар келбей калат", - деди ал.

Анда коомдук талкуунун катышуучулары ага "сүйлөбөй кал" деп сөзүн бөлгөнгө аракет кылышты.

Мирбеков эл менен бирге экенин, зыян болсо жабылышы керектигин айтып, сөзүн жыйынтыктады.

Учурда Жогорку Кеңеште уран кенин казууга биротоло тыюу салууга багытталган мыйзам долбоору боюнча коомдук талкуу өтүүдө.