Жогорку Кеңеште өлкө аймагында асыл тукум мал чарбаларын колдоого багытталган мыйзам долбоору каралды

Бүгүн, 8-майда Жогорку Кеӊеш жыйынында “Кыргыз Республикасынын мал чарбасындагы асылдандыруу иши жөнүндө” мыйзамына өзгөртүүлөрдү киргизүү тууралуу” мыйзам долбоору каралды.

Экинчи окуудагы мыйзам долбоорун жалпы жыйынга Агрардык саясат, суу ресурстары, экология жана региондук өнүгүү боюнча комитеттин төрагасы Айтмамат Назаров алып чыкты.

Айтымында, мыйзам долбоору өлкө аймагындагы асыл тукум мал чарбаларын колдоого багытталган. Геномдук селекция – бул малдын генотибин тактоо. Ал гендердин варианттары менен чарбалык пайдалуу белгилердин ортосундагы өз ара байланышты табууга, азыктуулук сапаттарынын баалуу белгилеринин популяциясын аныктоого жана бекемдөөгө, селекцияны максаттуу жүргүзүүгө мүмкүндүк берет.

Депутат Алмазбек Акматов өлкө аймагындагы катталган тогуз асыл тукум чарбасынын кейиштүү абалдан кантип чыгуу жолдорун сурады.

Буга Айыл чарба, тамак-аш өнөр жайы жана мелиорация министринин орун басары Жаныбек Керималиев асыл тукум чарбаларды өнүктүрүү, колдоо иш-чаралары колго алына баштагандыгын маалымдады.

Депутат Аалы Карашевдин суроосунан кийин геномдук селекция Агрардык университетте жүргүзүлө баштаганы, Кыргыз-Түрк "Манас" эл аралык университетинде дагы мүмкүнчүлүктөр бар экени белгилүү болду. Депутат асыл тукум чарбаларын колдоого каралган 36 миллион сомду өз багытында жумшоо керектигин, муну тармактык министрлик көзөмөлгө алышы зарылдыгын баса белгиледи.

Жыйынтыгында мыйзам долбоору 2-окууда добуш берүүгө жиберилди.