Президенттин кеңешчиси Дастан Догоев УКМКнын сурагынан чыкты

Мамлекеттик каттоо кызматынын мурдагы төрагасы, президенттин коомдук башталыштагы кеңешчиси Дастан Догоев УКМКнын сурагынан чыкты. Бул маалыматты "Интернет саясаты коомдук демилгесинин" директору Татту Мамбеталиева билдирди.

Анын айтымында, Дастан Догоев жарым саат мурун сурактан чыккан.

"Мен ага жана анын жактоочусуна жолуга алган жокмун. Себеби Догоевдин аялы ооруканага түшүп калгандыктан ошол жакка кетиптир. Ошондуктан азыр эч нерсе билбейм", - деди Мамбеталиева.

Буга чейин укук коргоочу Динара Ошурахунова өзүнүн социалдык тармактагы баракчасына Дастан Догоев УКМК тарабынан кармалганын жазып чыккан.

2018-жылдын июнь айында Дастан Догоев президент Сооронбай Жээнбековдун коомдук башталыштагы кеңешчиси болуп дайындалган.

Дастан Догоев Мамлекеттик каттоо кызматын 2017-жылдын июнь айынан 2018-жылдын февраль айына чейин жетектеген. Ал үй-бүлөлүк шартына байланыштуу бул кызматтан кеткени айтылган. Ага чейин Догоев 2014-жылдын июнь айынан бери Мамлекеттик каттоо кызматынын төрагасынын орун басары болуп иштеп келген.