Балдарды коргоо лигасы: "Жалал-Абадда 2 жашар кыздын сабалышы боюнча эч ким жоопкерчиликке тартыла элек"

Жалал-Абад облусунда оор абалда ооруканага түшкөн 2 жашар кыз апасынын өгөй энесинин колунда багылып жаткан. Бул тууралуу бүгүн, 10-майда Балдарды коргоо лигасынан кабарлашты.

Маалыматка ылайык, кыздын апасы Орусияда эмгектенет. Анын күйөөсү жок.

"Жабырлануучу кыздын энеси 5 жашар баласын дагы өзүнүн өгөй энесинин колуна таштап иштегени кеткен. Ал адам колунда дагы бир канча небере багып жатканы маалым болду. Алдын ала божомол боюнча кыз аталган үй-бүлөнүн зомбулугуна кабылган. Наристе башынан жаракат алган, денесинде көк ала тактар бар. Мындан улам кыздын абалы боюнча укук коргоо органдары эч кимди жоопкерчиликке тартпай жатат. Болгону кокустук деп баалап, кызга зомбулук болбогонун айтышууда", - деп жазылат маалыматта.

Сузак районундагы айылдардын биринен 2 жаштагы кыз оор абалда ооруканага келип түшкөн. Учурда кыздын абалы оор бойдон калып жатканын облустук балдар дарыгери билдирген. Ал эми Жалал-Абад ОИИБи окуя Кылмыштардын жана жоруктардын бирдиктүү реестрине каттоого алынып, экспертиза дайындалганын айткан.