Жалал-Абаддын эки тургуну бир жаранды жылаңач бойдон борбордук көчөдө басууга мажбурлашты

Жалал-Абаддын эки тургуну бир жаранды жылаңач бойдон борбордук көчөдө басууга мажбурлашты. Окуя видеого тартылып, элге жайылууда.

Видео унаалар токтоп турган жайда тартылган. Бир адам видеого тартса, экинчиси унаанын эшигин ачып түшүргөнүн көрүүгө болот. Тартып жаткан адам уят сөздөр менен сөгүп, унаанын ичинде жылаңач отурган жаранды түшүүгө мажбур кылган.

Анын "мен сенден качан 5 миң сурадым? 5 миңди мен бир күндө таап алам. Бар апаң отурган жакка бар" дегени угулат.

Бардык кийими чечилген бойдон турган адам ич кийим менен тосунууга аракет кылса, ага да тыюу салышат. Болжол менен окуя 10-майда болгон.

Жалал-Абад облусунун ички иштер башкармалыгынын басма сөз кызматы окуя иликтенип жатканын билдирди.

"Окуя боюнча текшерүү иштери жүрүп жатат. Тийиштүү материалдар чогултулуп, факты Кылмыштар жана жоруктардын бирдиктүү реестрине катталды. "Ээнбаштык" боюнча иш ачылып, сотко чейинки өндүрүшкө алынды. Видеодогу жарандын, аны тарткандардын аты-жөнү такталды. Булар эмне үчүн мындай кадамга барганы тергөөдө билинет", - деп билдиришти Жалал-Абад ОИИБиден.