Дагы бир судья өлкөдөн чыгып кетти. Күч органдары ага издөө жарыялайт

Өлкө аймагынан чыгып кеткен Москва районунун мурунку судьясы Марлес Феликске издөө жарыяланды. Бул тууралуу бүгүн, 15-майда УКМКнын басма сөз кызматынан билдиришти.

Маалыматка ылайык, экс-судья пара алууга шектелип, 2018-жылы күз айларында анын ыйгарым укуктары мөөнөтүнөн мурда токтотулуп, судьялык кызматынан бошотулган. Бул окуядан кийин судьялар кеңешинин дисциплинардык кеңеши Марлес Феликсти жоопкерчиликке тартууну талап кылган.

Айрым маалымат булактары жазып чыккандай, өлкө аймагынан чыгып кеткен судья талашка түшкөн жер тилкелери боюнча иштерди карап келген.

Буга чейин Октябрь райондук сотунун Эрнис Чоткараев аттуу судьясынын үстүнөн 2018-жылдын октябрь айынын соңунда Жогорку Соттон Судьялар кеңешинин дисциплинардык кеңешине мыйзамсыз иштерге барганы боюнча арыз түшүп кызматтан бошотулган. Кийин ал 1300 документти жок кылып, өлкөдөн чыгып кеткени айтылган. Учурда ал АКШда экендиги айтылат.