Өлкөдө "Сабаттуу бол" акциясы жүрүп жатат

Бүгүн, 15-майда өлкөдө "Сабаттуу бол" акциясы жүрүп жатат. Бул тууралуу Мамлекеттик тил боюнча улуттук комиссиясынан кабарлашты.

Маалыматка ылайык, акцияга мамлекеттик, муниципалдык кызматкерлер, окуу жайларынын, мектептердин, бала бакчалардын мугалимдери, журналисттер, коомдук уюмдардын өкүлдөрү, студенттер жана каалоочулар катыша алат.

"Акция жат жазуу түрүндө өткөрүлүп, китеп окууга, туура жазууга үндөө жана сабаттуу жазуу маданиятын өркүндөтүү максатын көздөйт. Жат жазуунун тексттери катышуучуларга алдын-ала берилбейт", - деп билдиришти улуттук комиссиядан.

Жат жазууну белгилүү инсандар окуйт. Жат жазуу башталар алдында конвертке салынган бир нече тексттин ичинен тандап алынат.

Бишкектеги акция Хусеин Карасаев атындагы Бишкек гуманитардык университетинде өткөрүлүүдө.