Жалал-Абад ооруканасында жаткан 2 жашар кыз 10 күндөн бери эсине келе элек. Кыздын апасы милицияга арыз жазды

Жалал-Абад облустук ооруканасына оор абалда келип түшкөн 2 жашар кыздын ден соолугунда 10 күндөн бери жылыш жок. Кыз алигиче дем алдыруучу аппараттын жардамы менен дем алууда. Бул тууралуу кыздын апасынын жанында жардам берип жүргөн Каныкей Азаматова аттуу айым SUPER.KG порталына билдирди.

Анын айтымында кыздын апасы кечээ Жалал-Абад ОИИБине барып арыз жазган.

"Апасы кызын бул абалга ким алып келген болсо, ошол жазасын алсын деп жатат. Азыр өзүнүн абалы деле жакшы эмес. Ал кызына 2 саат сайын кирип, "кызым мени таштап кетпе, сени жакшы көрөм" деп ыйлап жатат. Наристе комадан чыга элек.

Келинден кыздын атасы тууралуу сурасам, аны менен катышпай турганын жана ал кыздарынан кабар албаганын айтты. Кызын багууга таштап кеткен өгөй апасы тууралуу сурасак, "андан жаман нерсе күтпөйм. Орусияга деле айла жоктуктан кеткем. Көбүрөөк акча таап, эки кызымды колго алып жетиштүү багайын дегем. Бул жактан кетип жатканда жол киреге жана Орусиядан жумуш тапкыча жашап турганга деп насыя алып кеткем" деди кыздын апасы. Эми ошол алган насыясын айына 3 миң сомдон төлөп турушу керек экен. Учурда аны төлөшкөнгө жардам берели деп жатабыз", - деди Азаматова.

Сузак районундагы айылдардын биринен 2 жаштагы кыз оор абалда ооруканага келип түшкөн. Бул окуя боюнча Жалал-Абад ОИИБи кылмыш ишин ачкан. Кыздын абалы өтө оор деп бааланууда. Апасы Орусияда иштеп жүргөн. Ал эми кичинекей кызды апасынын өгөй энеси карап жатканы айтылган.