Африкада белгисиз бирөө Арнольд Шварценеггерге чабуул жасады

Түштүк Африка Республикасында 71 жаштагы америкалык актёр, спортчу жана саясатчы Арнольд Шварценеггерге чабуул жасалды. Бул тууралуу чет элдик маалымат каражаттары жазып чыгышты.

Маалым болгондой, окуя 18-майда өлкөнүн Йоханнесбург шаарындагы спорт залдардын биринде орун алды. Арнольд ал жерде өтүп жаткан бодибилдинг боюнча мелдешке калыс катары барган. Иш-чаранын жүрүшүндө белгисиз бирөө Шварценнегердин артынан чуркап келип эки буту менен секирип белге тепти. Жан сакчылары аны дароо кармап алышты.

Чабуулдан улам актёр жабыркабаганын видеодон көрсө болот. Бул окуядан кийин ал комментарий жазды. "Тынчсызданганыңарга рахмат, кабатыр болбогула. Көп адам артымдан түртүп жатат деп ойлогом. Мындай нерсе көп жолу кездешип турат. Ал эми мага чабуул жасалганын окуядан кийин видеодон көрдүм", - деди актёр.

Иш-чаранын уюштуруучулары билдиришкендей, Шварценеггерди белге тепкен киши буга чейин ушул сыяктуу аракеттерди жасаганы менен жергиликтүү полицияга белгилүү. Актёр ага каршы доо-арыз жазбай турганын билдирди. Ал бул окуяны жаман күйөрманынын кылыгы деп баалады.