Өзгөндө камалган блогер эркиндикке чыкты

Өзгөндө камалган блогер Бауржан Кадырбеков эркиндикке чыкты. Бул тууралуу Ош ОИИБинин басма сөз кызматы билдирди.

Өзгөн районунун Мырзаке айыл аймагынын тургуну 1987-жыл туулган Бауржан Кадырбековго "бейбаштык", "опузалап талап кылуу" боюнча кылмыш иши козголуп, сотко чейинки өндүрүш башталып тергөө жүрүп жаткан.

11-майда Өзгөн райондук сотунун тергөө судьясы тарабынан Кадырбеков 8-июнга чейин камакка алуу чечими чыгарылган. Анын адвокаты Өзгөн РИИБинин тергөө кызматына ишенбөөчүлүк көрсөтүп, Ош облустук ички иштер башкармалыгына арыз берген. Эки тарап элдешкенден кийин иш кыскартылганы белгилүү болду.

Белгилүү болгондой, блогер Өзгөн шаарынын аймагындагы дүкөндөрдү видеого тартып, жарыялап келген. Ал "товарлардын сактоо мөөнөтү өтүп кетти" деген доомат коюп, милиция кызматкерлерин беш ирет чакырган.

"Ар бир чакыруусунда милиция кызматкерлери барышып тийиштүү материалдарды топтоп, аны Өзгөн райондук Оорулардын алдын алуу жана мамлекеттик санитардык эпидемиологиялык көзөмөлдөө борборуна тийиштүү чара көрүү үчүн жөнөтүшкөн. Беш жолку чакыруунун бир учурунда товардын сактоо мөөнөтү өткөндүгү аныкталып, 5000 сом айып пул салынган. Ал эми калган учурларда сактоо мөөнөтү өтүп кеткен товарларды сатыктан чыгарып, тийиштүү мекемеге жиберүү үчүн даярдап койгон жеринен тартылгандыгы аныкталган. Бауржан Кадырбеков милиция кызматкерлерине карата эч кандай арыз менен кайрылган эмес, милиция кызматкерлери ага карата эч кандай күч колдонгон эмес", - деп билдирет Ош ОИИБи.