Жалал-Абад ооруканасында эсине келбей жаткан 2 жашар кыздын атасы андан кабар алып, дары-дармек сатып берди

Жалал-Абад облустук балдар ооруканасында оор абалда жаткан 2 жашар кыздын атасы бейтапканага келип кабар алды. Бул тууралуу кыздын апасынын жанында жардам берип жүргөн Каныкей Азаматова билдирди.

Анын айтымында, кыздын атасы келип, кызынын абалы менен таанышып, дары-дармегин алып берип кеткен.

Ал эми облустук оорукананын балдар дарыгери Бахадыр Муратов кыздын абалында жылыш болбой жатканын айтты. "Кыздын атасы ушундай окуяга кызы дуушар болуп калганына күнөөсү бар экенин моюнуна алып жатат", - деди Муратов.

Сузак районундагы айылдардын биринен 2 жаштагы кыз оор абалда ооруканага келип түшкөн. Бул окуя боюнча Жалал-Абад ОИИБи кылмыш ишин ачкан. Кыздын абалы өтө оор деп бааланууда. Апасы Орусияда иштеп жүргөн. Ал эми кичинекей кызды апасынын өгөй энеси карап жатканы айтылган. Кыздын атасы кыздарына келип кабар албай турганын кыздын апасы айтып чыккан болчу.