Красноярскта 3 айлык баласы катуу ыйлаганы үчүн аны ыргытып, баш мээси шишип кеткиче ооруканага кайрылбай жүргөн аялга кылмыш иши козголду

Красноярскта 3 айлык баласы катуу ыйлаганы үчүн аны күч менен диванга ыргытып, баш мээси шишип кеткиче ооруканага кайрылбай жүргөн аялга кылмыш иши козголду. Бул тууралуу бүгүн, 21-майда орусиялык маалымат каражаттары жазып чыкты.

Маалыматка ылайык, окуя февраль айында эле болгон. Анда 30 жаштагы Березовский айылынын тургуну баласынын ыйлаганына чыдабай аны диванга күч менен ыргыткан. Натыйжада бала башы менен дивандын жыгач кармагычына тийип, баш сөөгү сынып кеткен.

"Бирок эне кылыгын жашыруу максатында 2 ай ооруканага кайрылган эмес. Ымыркайдын баш мээсинде шишик пайда болуп, кетпей койгондо гана ооруканага келген. Дарыгерлер ымыркайдын баш мээси чайкалып, баш сөөгү сынганы аныкталган. Ага дароо операция жасалган, учурда анын абалы канааттандырарлык. Анын энесине кылмыш иши козголуп, учурда тергөө амалдары жүрүүдө. Мындан сырткары аны энелик укугунан ажыратуу маселеси каралууда", - деп айтылат маалыматта.