Кыргыз-Тажик чек арасындагы жарандардын чыры чек ара аймагында жайгашкан көрүстөндөн улам чыккан

Баткен облусунун Кара-Бак айылынын тургундары менен Тажик чек ара кызматкерлеринин ортосунда кайым айтышуу көрүстөндүн айынан чыккан. Бул маалыматты Кара-Бак айыл өкмөт башчысы Тургунбай Нышанбаев тастыктады.

Анын айтымында, кечээ, 20-майда кыргыз тарапка тийиштүү көрүстөндүн шаймандары сакталган сарайдын ичине Тажик чек арачылары кирип, жамгырдан корголоп турушкан. Муну көргөн кыргыз тарап аларды чыгарып салган.

"Бүгүн эртең менен айылда бир киши каза болгон. Ал эми көрүстөн такталбаган чек ара аймагында жайгашкан. Мындан улам биздин айылдын тургундары көр казууга барышса, тажик тараптын чек арачылары киргизбей коюшкан экен. Түшүнбөстүктү эки элдин тең тийиштүү кызматкерлери келип чечишти. Негизи чек арага жаңы аскерлер келсе ушундай түшүнбөстүктөр жаралып турат. Себеби алар эл ары-бери өтүп турарын же жер такталбаган аймак экенин билбей калышат", - деди айыл өкмөт башчы. Учурда абал тынч.

Буга чейин Чек ара кызматы эки элдин ортосундагы кайым айтышуу сарайдын сынган каалгасынан улам чыккан деп маалымат тараткан.