Мурдагы вице-премьер Шамиль Атаханов 26-июнга чейин убактылуу кармоочу жайда калтырылды

Тектеш кабарлар: Азиз Батукаевдин абактан бошотулушун кайра кароо иши (97 материал)

Бүгүн, 23-майда Биринчи Май райондук сотунда мурдагы вице-премьер министр Шамиль Атахановдун баш коргоо чарасы каралды.

Сот Атахановду ушул жылдын 26-июнуна чейин СИЗО-1де калтыруу чечимин чыгарды.

Экс-вице-премьер кримтөбөл Азиз Батукаевдин мыйзамсыз бошотулушу боюнча иликтенип жаткан кылмыш ишинин алкагында 21-майда кармалган.

Мындан 6 жыл мурун Нарын шаардык соту Батукаевди "айыккыс дартка чалдыкты" деген жүйө менен бошотуп, ал ошол эле күнү өлкөдөн чыгып кеткен болчу.

16-майда Батукаевди мыйзамсыз бошотуу боюнча мурдагы саламаттыкты сактоо министри Динара Сагинбаева менен Жазаларды аткаруу мамлекеттик кызматынын төрагасынын мурдагы кеңешчиси Калыбек Качкыналиев СИЗО-1ге киргизилген. Ага чейин Батукаевдин иши боюнча дарыгер Эмил Макимбетов жана лаборант Ирина Цопова камакка алынган. Андан кийин дагы 3 дарыгердин бул иш боюнча баш коргоо чарасы каралып, тергөө абагына киргизилген.