Ноокатта мектеп окуучулары жол кырсыгына кабылды

Кечээ, 24-майда Ноокат районунун Ынтымак айылында мектеп окуучулары жол кырсыгына кабылды. Бул тууралуу Ош ОИИБинин басма сөз кызматы билдирди.

Маалыматка ылайык, кырсык кечээ саат 18:30 чамасында болгон. "Ноокат районунун Ак-Чал айылынын 2002-жылы туулган Т.У. аттуу тургуну атасына таандык унааны айдап чыгып, айылдан Кызыл-Кыя шаарын көздөй бара жатып , автоунааны башкара албай жолдон чыгып кеткен. Алар унаа менен турак үйдүн короосуна кирип кетип сарайды сүзүп токтогон. Натыйжада айдоочу Т.У., жүргүнчүлөр ошол айылдын тургундары 2002-жылы туулган А кызы А., жана С.С. денелеринен жеңил жараат алышкан. Ал эми 2001-жылы туулган А.Бнын буту сынып Кызыл-Кыя шаарынын ооруканасына кайрылышкан. Алардын алган дене жарааты боюнча атайын соттук-медициналык экспертиза дайындалган. Ал эми унаа Ноокат РИИБдин убактылуу айып төлөөчү жайына токтотулду. Бул факт Кылмыштардын жана жоруктардын бирдиктүү реестрине катталып, тергөө иштери жүрүп жатат", - деп жазылат маалыматта.