Айыл чарба министри кызматына өзүнүн талапкерлигин сунуштаган 28 жаштагы Токтогазиев: "Коомчулуктан ушунчалык колдоо болот деп күткөн эмесмин"

Ишкер Тилек Токтогазиев кечээ, 24-майда айыл чарба, тамак-аш өнөр жайы жана мелиорация министри кызматына өзүнүн талапкерлигин сунуштаган. Ал бүгүн, 25-майда маалымат жыйын өткөрдү. Анда Токтогазиев министр кызматына талапкерлигин сунуштагандан кийин коомчулуктан ушунчалык колдоо болот деп күтпөгөнүн айтты.

"Азыркы убакта Кыргыз мамлекетинин ар кайсы аймактарындагы, чет мамлекеттердеги күчтүү кесипкөйлөрдөн колдоолорду алдым. Ошол колдоо менен жакшы команда түзүп, айыл чарба тармагында кескин реформаларды жасайбыз. Биз айыл чарбаны жаңы деңгээлге чыгарганга даярбыз. 100 миңдеген дыйкандарыбыз былтыр продукцияларын сатканда кыйналышты. Биз бул көйгөйдү чечүүгө аракеттенебиз", - деди ал.

Тилек Токтогазиев алгачкы миллион сомун 22 жашында тапканын жана чоң күнөсканаларды куруп иштетип жатканы менен коомчулукка белгилүү.

Кечээ айыл чарба, тамак-аш өнөр жайы жана мелиорация министри Нурбек Мурашев отставкага кетүү боюнча арыз жазган.