Мечиттен 12 килем жоголду. Милиция шектүү катары мурда алдамчылык, уурулук менен соттолгон 20 жаштагы жаранды кармады

Сокулук районунун милиция кызматкерлери уурулукка шектелген жаранды кармашты. Бул тууралуу Чүй облустук ички иштер башкармалыгынын маалымат кызматынан билдиришти.

Апрель айынын аяк ченинде Сокулук РИИБине Шалта айылынын жашоочусу мечиттен 12 килем жана башка курулуш материалдары уурдалганын кабарлап, кылмышкерди таап, чара көрүүнү суранган.

Аталган факты Кылмыштардын жана жоруктардын бирдиктүү реестрине катталып, Кылмыш-жаза кодексинин 200-беренеси (уурулук) боюнча кылмыш иши козголуп сотко чейинки өндүрүш башталды. Бул кылмыш ишин ачуу үчүн тиешелүү кызматтарга тапшырма берилген.

Жыйынтыгында милиция кызматкерлери тарабынан тиешелүү иликтөө иштери жүргүзүлүп, Б.А. аттуу 20 жаштагы жаран кармалды. Анын буга чейин да уурулук, мал уурулук жана алдамчылык фактысы боюнча соттолгондугу аныкталган. Сотко чейинки териштирүү иштеринде милиция кызматкерлери Б.А.нын ушул жылдын 7-майында Кызыл-Туу айыл аймагында катталган мал уурулукка да тиешеси бар экенин билишкен.

"Кылмышкер уурдалган малды интернет айдыңында жарнама кылып сатууга аракеттенгенин мал ээлери байкап калышкан" деп билдирди Чүй ОИИББинин маалымат кызматы. Кармалган жаран Сокулук РИИБинин убактылуу кармоочу жайына киргизилди. Тергөө амалдары жүрүп жатат.