Путинге, Лукашенкого, Жээнбековго Казакстан тунгуч президентинин ордени тапшырылды

Бүгүн, 28-майда Казакстандын тунгуч президенти Нурсултан Назарбаев Кыргыз мамлекет башчысы Сооронбай Жээнбековго Казакстан тунгуч президентинин орденин тапшырды. Бул тууралуу президенттик аппараттын басма сөз кызматы билдирди.

Маалыматка ылайык, президент Сооронбай Жээнбеков Нур-Султан шаарына Жогорку Евразиялык экономикалык кеңешинин мааракелүү жыйынына катышуу үчүн барган.

Сооронбай Жээнбеков Нурсултан Назарбаевдин Кыргыз-Казак өлкөсүнүн ортосундагы бир туугандык мамилени орнотуп, бекемдөөгө кошкон жеке салымын белгиледи. Өлкөлөр ортосунда эки тараптуу гана эмес, эл аралык уюмдардын алкагында көп тараптуу кызматташтык жана өз ара аракеттенүү өнүгүүдө. Ал ошондой эле Нурсултан Назарбаевдин евразиялык интеграцияны түзүү жөнүндөгү демилгеси иш жүзүнө ийгиликтүү ашып жатканын белгиледи.

Президент Сооронбай Жээнбеков Нурсултан Назарбаевге ийгиликтерди каалап, өлкөлөр ортосундагы эки тараптуу кызматташтыктын мындан ары дагы тереңдешине ишенимин билдирди.

Казакстандын тунгуч президенти Нурсултан Назарбаев Кыргыз мамлекети менен мамилелерди өнүктүрүүнү ар дайым колдоп келгенин жана колдой берерин белгиледи.

Нурсултан Назарбаев президент Сооронбай Жээнбековдун алган багытын колдогонун белгилеп, анын мындан аркы иштерине ийгиликтерди каалады.

Казакстан тунгуч президентинин ордени Жээнбековдон тышкары Орусиянын президенти Владимир Путинге жана Беларустун президенти Александр Лукашенкого тапшырылды.