Токон Мамытов: “Нарында кыргыздарга кол көтөргөн кытай жарандары кандай жаза алары азырынча белгисиз”

Нарын облусунда кыргыздарды сабаган кытайлык “Чайна роуд” компаниясынын кызматкерлери кандай жоопкерчиликке тартылары иликтөөнүн жыйынтыгында билинет. Маалыматты КРнын коргоо, коопсуздук жана чек ара маселелери боюнча вице-премьер-министри Токон Мамытов 1-августта билдирди. Айтымында, учурда ИИМдин Нарын облустук башкармалыгынын өкүлдөрү жаңжал чыккан жерде териштирүү иштерин жүргүзүүдө. “Окуя болгон жерге чогулган кыргыздарга “Чайна роуд” ишканасынын жоопкерчиликтүү өкүлү чыгып, кандайдыр-бир дары-дармек үчүн же дарылануу үчүн акча каражатын, компенсация төлөп берүүгө даяр экендигин билдирди”,- деп кошумчалады ал. Эске салсак, кечээ, 31-июлда Нарын облусунда кытайлык “Чайна роуд” жол-курулуш ишканасында иштеген кытайлар 4 кыргыз жаранын сабап салышкан.