"Жакшы келдиңизби? Жакшы барыңыз" дешет. Депутат туризм жөнүндө айтып, Өзбекстанды мисал келтирди

"Өзбекстанда чек арачыларынан баштап, жол коопсуздугун көзөмөлдөгөн кызматкерлеринен бери барган туристтерге "жакшы келдиңизби?", "жакшы барыңыз" деп турса, бизде чек арачылар кезек күттүрүп жатат" деп бүгүн, 30-майда Жогорку Кеңештин жыйынында депутат Кубанычбек Нурматов айтты.

"Туристтик топторго жеңилдетилген визаларды берүү керек. Туризмди өнүктүрүүгө жетишерлик көңүл буруу зарылчылыгы турат. Себеби коңшу өлкөлөр бул нерсеге чоң маани берүүдө. Эгер биз туризмди жөнгө салып алсак, картошка жана башкасын сатабыз деп убара болбойбуз.

Мисалы, Өзбекстанда чек арачыларынан баштап, жол коопсуздугун көзөмөлдөгөн кызматкерлеринен бери "жакшы келдиңизби?", "жакшы барыңыз" деп кофе куюп турушат. Ал эми бизде чек арачылар кезек күттүрүп коюшат. Чек арадагы текшерип өткөрүүчү жерде 2 эле кызматкер отурат, калгандары башка жагында жүрөт. Бул маселелер чечилбесе чек ара кызматынын башчысын алмаштырып, башка адамды алып келгиле. Келген конок чек арадан кандай тосулса, өлкө тууралуу да ошондой ойдо калат", - деди депутат.