Ооруканада жаткан Текебаевге апасы жолукту

Кечээ, 2-июнда абактан ооруканага которулган Өмүрбек Текебаевге апасы барып жолугуп келди. Бул тууралуу SUPER.KG`ге анын тарапташтары билдиришти.

Буга чейин ЖАМКтан маалымдашкандай, 31-майда Өмүрбек Текебаев 47-колониядан Улуттук кардиология жана терапия борборуна которулган. Анын кайра абакка качан которулары дарыгерлердин айтканына жараша болот. Саясатчы жарым жылда бир жолу текшерүүдөн өтүп турушу керек.

Өмүрбек Текебаев менен Дүйшөнкул Чотонов "коррупция" боюнча айыпталып, 8 жылга эркинен ажыратылган. Буга негиз болгон көрсөтмөнүн ээси Леонид Маевскийдин өзү Орусияда олуттуу кылмыш ишине шектелип, камакка алынган.

3-майда Жогорку Сот Өмүрбек Текебаев менен Дүйшөнкул Чотоновдун ишин жаңы жагдайлар боюнча кайра карап, үй-мүлктү конфискацияга алуудан тышкары өкүмдү өзгөртүүсүз калтырган.