"Ай көрүндү, Орозо айт бүгүн белгиленет" дегендерге муфтият жооп берди

Кыргыз өлкөсүндө Орозо айт майрамы эртең, 5-июнда белгиленет. Бул тууралуу муфтияттын басма сөз кызматы SUPER.KG порталына билдирди.

"Сауд Арабия, Түркия, Орусияда Ай көрүндү деп айтып жатышат. Бирок биз Кыргыз Республикасы эгемендүү мамлекетпиз. Шариятта айтылгандай, жөө жүргөндө бир айлык жолго чейинки мамлекеттерди ээрчисек болот. Ал эми Сауд Арабия бизге бир айлык эмес, бир канча убакыттык жол. Ошон үчүн Сауд Арабиясын ээрчүүгө милдеттүү эмеспиз. Кыргыз мамлекети, Казакстан, Өзбекстан, Тажикстан, Түркия, Индия, Пакистан, Австралия, Малайзия, Корея, Япония, Дагестан жана Кувейт, Египет, Иордания, Сирия сыяктуу араб мамлекеттеринде Орозо айт майрамын 5-июнда белгилешет", - деп билдирди басма сөз кызматы.

Айрымдар Ай көрүнгөнүн айтышып, бүгүн, 4-июнь Орозо айт майрамы белгилене турганын жазышууда.