"Дөө Чыңгыз" дагы 2 айга камакта калды

Бүгүн, 4-июнда Бишкектин Биринчи Май райондук сотунда уюшкан кылмыштуу топтун мүчөсү "Дөө Чыңгыз" каймана аты менен белгилүү Чыңгыз Жумагуловдун иши каралды. Ал Бишкектеги №2 төрөт үйүнүн алдына катуу сабалып ташталган эки адамдын өлүмүнө шектелүүдө.

Ал сот залына атайын кызматтагы жоокерлердин коштоосунда алып келинип, соттук отурум бир жарым сааттан ашык убакыт болду. Жыйынтыгында Жумагуловдун баш коргоо чарасы 2 айга узартылып, ал 10-августка чейин камакта кала турган болду.

Окуянын чоо-жайына кайрылсак:

9-апрелден 10-апрелге караган түнү саат 01:45 чамасында Бишкектеги №2 төрөт үйүнө эс-учун жоготкон абалда 2 жаран жеткирилген. Окуя болгон жерге милициянын ыкчам-тергөө тобу барган. Анда №2 төрөт үйүнүн эшигинин алдына белгисиз жарандар катуу сабалган 2 жаранды таштап кетишкени белгилүү болгон. Алар кийин каза болушкан.

Бул кылмышка шектелип Чүй облусунун 1984-жылы туулган Т.М. жана 1981-жылы туулган А.И. аттуу жарандары кармалган. Алар убактылуу кармоочу жайга киргизилген. Маалымат боюнча алар уюшкан кылмыштуу топтун мүчөлөрү. Мурда бир нече жолу соттолушкан. Ошондой эле бул окуя боюнча 11-апрелде криминалдык милиция кызматкерлери тарабынан Чыңгыз Жумагулов Бишкек шаарынан кармалган.