Малайзиянын мурдагы падышасына турмушка чыккан орусиялык модель мураскер төрөдү

Малайзиянын мурдагы падышасы Мухаммад V`ке турмушка чыккан "Москва сулуусу-2015" сынагынын жеңүүчүсү Оксана Воеводина көз жарды. Бул тууралуу ал социалдык тармактагы баракчасына 4-июнь күнү жазып чыккан. Анда ал 21-майда уулдуу болгонун жана кош бойлуу кезиндеги учурлар тууралуу билдирүү калтырган.

"Кош бойлуу кезимде мага төрөттөн кийинки өзгөрүүлөр тууралуу көп айтышкан. Анын баары чын экен. Ал эми балага болгон сүйүү өзгөчө, сезимдер башкача. Эми биз үчөөбүз. Биздин үй-бүлөнү тандаганыңа рахмат, уулум" деген билдирүүсүн калтырган.

Чет элдик басылмалардын маалыматына ылайык, ымыркайга Тенку Исмаил Леон Петра бин Тенку Мухаммад V Фарис Петра деген ысым коюлган. Орусиялык модель үчүн кош бойлуулук аябай оор болгон. Ал 90 күн бою ооруканада жатып, тамчылатып ийне саюу алганын айткан.

2018-жылы 22-ноябрда 49 жаштагы Мухаммад V "Москва сулуусу-2015" сынагынын жеңүүчүсү, модель Оксана Воеводинага баш кошкон. Ал эми алардын ажырашуусунун себеби Мухаммад V'тин өз эрки менен тактан баш тарткандыгынан улам деген маалыматтар тараган. Кийинчерээк жубайлардын ажырашуусу тууралуу маалымат эч ким тарабынан тастыкталбаганы жана бул жөн гана ушак кептер экени айтылган.