Аида Салянованын бүгүнкү күнгө жылдырылган соту качан башталары белгисиз

Кримтөбөл Азиз Батукаевдин абактан мыйзамсыз бошотулушу боюнча кайрадан каралып жаткан иштин негизинде кармалган мурдагы Башкы прокурор Аида Салянованын баш коргоо чарасы бүгүн, 5-июнда Биринчи Май райондук сотунда саат 10:00дө каралмак.

Бирок азыркыга чейин Аида Салянованын баш коргоо чарасы качан, кайсы убакта каралары белгисиз. Ошондой эле Биринчи Май райондук соту жабык.

Ал эми соттун алдында Аида Салянованын апасы, Өмүрбек Текебаевдин аялы, туугандары, тарапташтары жана колдоочулары келген. Эл өкүлдөрүнөн Жогорку Кеңештин мурдагы депутаты Асия Сасыкбаева, жарандык активисттер Адил Турдукулов, Мирбек Айтикеев бар.

Учурда сот качан башталары боюнча так маалымат жок.

Окуянын чоо-жайы:

16-майда Батукаевди мыйзамсыз бошотуу боюнча мурдагы саламаттыкты сактоо министри Динара Сагинбаева менен Жазаларды аткаруу мамлекеттик кызматынын төрагасынын мурдагы кеңешчиси Калыбек Качкыналиев СИЗО-1ге киргизилген. Ага чейин Батукаевдин иши боюнча дарыгер Эмил Макимбетов жана лаборант Ирина Цопова камакка алынган. Андан кийин дагы 3 дарыгердин бул иш боюнча баш коргоо чарасы каралып, тергөө абагына киргизилген. 21-майда мурдагы вице-премьер-министр Шамиль Атаханов да кармалып, 26-июнга чейин камакка алынган.

Мындан 6 жыл мурун Нарын шаардык соту Батукаевди "айыккыс дартка чалдыкты" деген жүйө менен бошотуп, ал ошол эле күнү өлкөдөн чыгып кеткен болчу. 2013-жылы Башкы прокурор Аида Салянова Жогорку Кеңештин депутаттарынын суроолоруна жооп берип жатып, "айыккыс дартка кабылган адамдын" абактан бошотулушу мыйзамдуу деп айткан. "Биз бизде бар мыйзамдар менен иштедик. Эгер сиздер мыйзамдагы уурунун иши башкача, башка адамдардын иши өзүнчө каралышы керек десеңер ошондой мыйзам кабыл алгыла. Биз ошого карата иштейбиз", - деген ал.