Аида Салянованын кичинекей кызы сотто апасын издеп ыйлады

Бүгүн, 5-июнда Биринчи Май райондук соту мурдагы башкы прокурор Аида Салянованы 26-июнга чейин камакка алуу чечимин чыгарды. Ал кримтөбөл Азиз Батукаевдин мыйзамсыз бошотулушу боюнча кайра каралып жаткан иштин негизинде кармалган.

Соттун чечими чыккан соң укук коргоо органдарынын кызматкерлери Аида Салянованы унаага отургузуп, камакка алып кетишти. Муну көргөн анын тарапташтары соттун чечимине нааразычылыгын билдиришти. Алардын арасында Салянованын 3 жашар кызы жүрдү. Ал апасын издеп, таппай ыйлап жиберди.

Окуянын чоо-жайы:

16-майда Батукаевди мыйзамсыз бошотуу боюнча мурдагы саламаттыкты сактоо министри Динара Сагинбаева менен Жазаларды аткаруу мамлекеттик кызматынын төрагасынын мурдагы кеңешчиси Калыбек Качкыналиев СИЗО-1ге киргизилген. Ага чейин Батукаевдин иши боюнча дарыгер Эмил Макимбетов жана лаборант Ирина Цопова камакка алынган. Андан кийин дагы 3 дарыгердин бул иш боюнча баш коргоо чарасы каралып, тергөө абагына киргизилген. 21-майда мурдагы вице-премьер-министр Шамиль Атаханов да кармалып, 26-июнга чейин камакка алынган.

Мындан 6 жыл мурун Нарын шаардык соту Батукаевди "айыккыс дартка чалдыкты" деген жүйө менен бошотуп, ал ошол эле күнү өлкөдөн чыгып кеткен болчу. 2013-жылы башкы прокурор Аида Салянова Жогорку Кеңештин депутаттарынын суроолоруна жооп берип жатып, айыккыс дартка кабылган адамдын абактан бошотулушу мыйзамдуу деп айткан. "Биз, бизде бар мыйзамдар менен иштедик. Эгер сиздер мыйзамдагы уурунун иши башкача, башка адамдардын иши өзүнчө каралышы керек десеңер, ошондой мыйзам кабыл алгыла. Биз ошого карата иштейбиз", - деген ал.