Орок айылында Айт намаздан кийин катуу сабалган эки өспүрүмдүн абалы туруктуу

Чүй облусунун Орок айылында Айт намаз учурунда катуу сабалган эки өспүрүмдүн абалы туруктуу. Бул тууралуу Саламаттыкты сактоо министрлигинин басма сөз кызматы билдирди.

Маалыматка ылайык, азыркы учурда эки өспүрүм дарыгерлердин көзөмөлүндө. Ал эми жандандыруу бөлүмүнө жаткырылган Тимур бүгүн палатага которулат. Алдын ала чыккан диагноз боюнча эки өспүрүм тең баш мээсинен жаракат алышкан.

Окуянын чоо-жайы:

5-июнь күнү болжол менен саат 08:30 чамасында Орок айылында жайгашкан мечиттен Айт намазы окулуп, андан чыгып бара жаткан 3 өспүрүм бала бири-бири менен уруша кетишкен. Анда 2 өспүрүм бала 1 баланы жалгыздап сабап салышып, жабыркаган бала ооруканага жеткирилген. Мындан соң урушуп кеткен балдардын туугандары 2 тарап болуп нааразычылык акциясына чыгышкан. Бул учурда 2 тараптан мыйзамга жат келген иш-аракеттер жасалып, 15 үйдүн терезелери талкаланып, чөп жыйылып турган 1 сарай өрттөлгөн. Буга шектелип 30дай киши Сокулук РИИБине жеткирилген.