Тышкы иштер министрлиги түрк элчисинин Орок айылына баруусу боюнча кеңешме өткөрөт

Тышкы иштер министрлиги Түркиянын Кыргыз өлкөсүндөгү элчисинин Орок айылына баруусу боюнча кеңешме өткөрөт. Бул тууралуу министрликтин басма сөз кызматы кабарлады.

"Бүгүн Женгиз Камил Фыраттын Сокулуктагы ызы-чуу чыккан айылга баруусун өз ара талкуулайбыз. Кеңешмеге элчи өзү да катышат. Жыйынтыгы боюнча кечке чейин маалымат таратабыз" деди Тышкы иштер министрлигинин басма сөз катчысы Уланбек Дыйканбаев.

Окуянын чоо-жайы:

5-июнь күнү болжол менен саат 08:30 чамасында Орок айылында жайгашкан мечиттен Айт намазы окулуп, андан чыгып бара жаткан 3 өспүрүм бала бири-бири менен уруша кетишкен. Уруштан 2 өспүрүм жабыркап, ооруканага жеткирилишкен. Мындан соң урушуп кеткен балдардын туугандары 2 тарап болуп нааразычылык акциясына чыгышкан. Бул учурда 2 тараптан мыйзамга жат келген иш-аракеттер жасалып, 15 үйдүн терезелери талкаланып, чөп жыйылып турган 1 сарай өрттөлгөн. Башаламандык уюштурууга шектелип 30дай киши Сокулук РИИБине жеткирилген.

Окуя болгон жерге түрк элчисинин баруусу социалдык тармактарда катуу талкууга алынып, анын Кыргыз өлкөсүнүн ички маселелерине аралашуусу сынга алынууда.