Ороктогу жаңжал. Депутат үй камагына чыгарылды

Орок айылында чыккан жаңжал боюнча шектүү катары кармалган айылдык кеңештин депутаты Кылычбек Боркоев үй камагына чыгарылды. Бул тууралуу SUPER.KG порталына Кыйноолордун алдын алуу боюнча улуттук борбордун директору Нурдин Сулайманов билдирди.

Анын айтымында, мындай чечимди Сокулук райондук соту бүгүн, 6-июнда чыгарды.

Боркоев бүгүн саат 11:00 чамасында кармалганы белгилүү болгон. Аны бошотуу талабы менен 80дей адам чогулуш өткөрүшкөн.

Окуянын чоо-жайы:

5-июнь күнү болжол менен саат 08:30 чамасында Орок айылында жайгашкан мечиттен Айт намазы окулуп, андан чыгып бара жаткан 3 өспүрүм бала бири-бири менен уруша кетишкен. Анда 2 өспүрүм бала 1 баланы жалгыздап сабап салышып, жабыркаган бала ооруканага жеткирилген. Мындан соң урушуп кеткен балдардын туугандары 2 тарап болуп нааразычылык акциясына чыгышкан. Бул учурда 2 тараптан мыйзамга жат келген иш-аракеттер жасалып, 15 үйдүн терезелери талкаланып, чөп жыйылып турган 1 сарай өрттөлгөн. Буга шектелип 31 киши Сокулук РИИБине жеткирилген.