Өлкөдө жаңы үлгүдөгү айдоочулук күбөлүктөр чыгарылат. Алардын баасы эки эсе арзан болот

Мамлекеттик каттоо кызматы калктын жаңы үлгүдөгү айдоочулук күбөлүктөргө өтүү процессине даярдык көрүп жатат. Бул тууралуу бүгүн, 6-июнда Мамлекеттик каттоо кызматынын төрагасы Алмаз Мамбетов президент менен жолугушууда билдирди.

Мамбетовдун айтымында, жаңы күбөлүктөрдүн баасы эки эсеге арзан болот. "Буга чейин бул иш менен жеке менчик компания алектенчү, эми бул долбоорду Мамкаттоо кызматы ишке ашырат", - деди ал.

Мамлекеттик каттоо кызматынын төрагасы жаңы айдоочулук күбөлүктү киргизгенге чейин бул документти биринчи жолу же жаңыдан алып жаткандар үчүн убактылуу айдоочулук күбөлүк киргизилерин баса белгиледи.

Алмаз Мамбетов жарандардын жүгүн жеңилдетүү үчүн мамлекеттик кызматтарды оптимизациялоо жүргүзүлөрүн, ошондой эле өлкөнүн Калкты тейлөө борборлорунда мамлекеттик кызматтардын жаңы түрлөрү кошумча киргизилерин да айтты.