Улуттар Лигасынын финалында Португалия-Нидерланды курамалары беттешет

7-июнга караган түнү Улуттар Лигасынын жарым финалында Нидерланды жана Англия курама командалары беттешти.

Беттеш Португалиядагы "Афонсу Энрикеш" стадионунда өттү. 32-мүнөттө Нидерланды курамасынын дарбазасына пенальти дайындалды. Айып соккуну Маркус Решфорд таамай аткарып, Англияны алдыга алып чыкты. 73-мүнөттө Маттейс де Лигт эсеп санын теңеди. Беттештин негизги убактысы тең чыгуу менен жыйынтыкталып, кошумча 30 мүнөт убакыт берилди. 97-мүнөттө англиялык коргоочу Кайл Уокер өз дарбазасына гол жаратып атаандашын алдыга алып чыкса, 114-мүнөттө жаралган Квинси Проместин голу эсеп санын Нидерланды өлкөсүнүн пайдасына 3:1ге айлантты. Жыйынтыгында Англия курама командасы жеңилүү ызасын тартып, Улуттар Лигасынын финалына чыкпай калды. Эми аталган команда 3-орун үчүн Швейцария менен беттешет.

Жарым финалдык беттештин 1-жубу Португалия-Швейцария беттеши 6-июнга караган түнү Порту шаарында орун алып, талаа ээлери жеңишке жеткен.

Португалия-Нидерланды беттеши 10-июнда орун алат.