Валентина Шевченко: "Чемпиондук курду кантип коргоо керектигин билем"

9-июнда АКШнын Чикаго шаарында "UFC 238" мелдешинин алкагында Кыргыздан чыккан мушкер Валентина Шевченко алгачкы ирет чемпиондук курун коргойт. Шевченконун атаандашы бул ирет АКШлык Жессика Ай болмокчу.

Мелдештин алдында Валентина Шевченко чет элдик басылмаларга маек берип, алдыдагы беттеш тууралуу ойлору менен бөлүштү.

"Чемпиондук кур менин өмүрүмдөгү башкы максатым болчу. Ал эми курга ээ болгондон кийинки максатым аны мүмкүн болушунча узак убакытка сактап туруу. Мен учурда "бул ирет мага атаандаш болобу, рейтингимди дагы жогорулата аламбы?" деп ойлонбойм. Анткени мени менен бирдей салмак чениндеги мушкерлердин арасында чемпиондук курумду тартып алууну каалагандар көп. Ошондуктан мурункуга караганда 2-3 эсе көбүрөөк машыгышым керек. UFC`нин чемпиондук куруна ээ болгонго чейин 16 жолу дүйнө чемпиону болгом. Андыктан өз позициямды кантип коргоо керектигин билем.

Алдын ала кайсы беттеш кыйын, кайсынысы оңой болорун айтуу мүмкүн эмес. Ар дайымкыдай жогорку деңгээлде машыгуу жыйындарын өткөрдүм. Октагондун эшиктери жабылары менен менде көнгөн адаттарым, мүмкүнчүлүгүм гана калат. Беттеш учурунда ар дайым бирдей эмоция, басым болот. Андыктан болгон күчүмдү жумшап, машыгып, октагонго эң мыкты даярдык менен барышым керек", - деди Шевченко.

Жессика Ай карьерасында 20 беттеш өткөрүп, 14 жолу жеңишке жетип, 6 жолу жеңилип калган. Валентина Шевченко болсо өткөн жылдын декабрь айында Йоанна Енжейчик менен беттешип, жеңил салмактагы чемпиондук курга ээ болгон.