Зарылбек Рысалиев: "Кан басымым көтөрүлүп кетиптир. Ооруканада жатам" (толукталды)

Жогорку Кеңештин депутаты Зарылбек Рысалиев ооруканада жатканын SUPER.KG порталына билдирди. "Кан басымым көтөрүлүп кетиптир. Азыр абалым жакшы эле", - деп эл өкүлү саат 21:30га карата айтып берди.

Рысалиев 48 саатка убактылуу кармоочу жайга киргизүү тууралуу протокол боюнча так жооп бербей, Башкы прокуратуранын маалыматына таянууга чакырды. Бул мекеме Рысалиевдин камакка алынбаганын, күбө катары сурак бергенден кийин коё берилгенин билдирген.

Бүгүн, 7-июнда Зарылбек Рысалиев кримтөбөл Азиз Батукаевдин мыйзамсыз бошотулушу боюнча сурак берип жатып өзүн начар сезип, ооруканага жеткирилген.

SUPER.KG порталына өздүк булактар кабарлашкандай, сурак аяктагандан кийин Рысалиевди 48 саатка убактылуу кармоочу жайга киргизүү боюнча протокол түзүлгөндө, өзүн начар сезип баштаган. Мындан улам ооруканага жеткирилип, аны конвой кайтарып жатканы айтылган.

Азиз Батукаев түрмөдөн бошотулуп, өлкөдөн чыгып кеткен чуулуу окуя учурунда Рысалиев Жаза аткаруу мамлекеттик кызматынын башчысы болчу.