Сүйүнчү! Валентина Шевченко атаандашын нокаутка учуратып, UFC`деги чемпиондук курун коргоп калды (хронология)

Кутман таң, ардактуу спорт сүйүүчүлөрү. Учурда АКШнын Чикаго шаарында "UFC 238" мелдеши өтүп жатат. Жалпы 13 беттеш өтө турган мелдештеги негизги беттештердин бири аялдар арасындагы эң жеңил салмактагы чемпиондук кур үчүн беттеш болмокчу. Аталган беттеште Кыргыз мушкери Валентина Шевченконун чемпиондук курун АКШлык Жессика Ай талашмакчы. Шевченко өз курун коргоп кала алабы же жокпу бир нече мүнөттөрдөн кийин белгилүү болот.

8:42. Оор салмактагы мушкерлер Тай Туйваса менен Благой Ивановдун беттешинде Иванов жеңишке жетишти.

8:57. Учурда Пётр Ян - Жимми Ривера беттеши өтүүдө.

9:10. Биринчи раунддун алгачкы мүнөттөрүндө АКШлык Ривера активдүүлүк көрсөтүп жатканы менен акыркы секунддарда орусиялык Ян бир нече соккуларды узатып, атаандашын нокдаунга учуратты.

9:16. Калыстардын бирдиктүү чечими менен орусиялык мушкер Пётр Ян жеңишке жетишти.

9:34. Учурда 2 АКШлык мушкер Тони Фергюсон менен Дональд Серроненин беттеши башталууда.

9:48. Алгачкы раундда 2 мушкер тең дээрлик бирдей активдүүлүк көрсөтүүдө. Фергюсон сокку урганга басым жасаса, Серроне көбүрөөк таамай тийгизди.

9:58. Серроненин көзү шишип кеткендигине байланыштуу дарыгерлер ага беттешти улантууга уруксат берген жок. Жыйынтыгында техникалык нокаут менен Тони Фергюсон жеңишке жетишти.

10:05. Кыргыз күйөрмандары көптөн көп күткөн Шевченко - Ай беттеши башталуу алдында турат.

10:09.Кыргыз өлкөсүнүн жана Перунун желегинин коштоосунда Валентина Шевченко октагонго чыгып келе жатат.

10:14. Шевченко - Ай беттеши башталды. Залдан кыргыз желегин көтөрүп кыргыз мушкерине жан тартууга келген күйөрмандарды көрүүгө болот.

10:19. Биринчи раунд жыйынтыкталды. Беттешти толугу менен Шевченко көзөмөлдөп, 2 жолу атаандашын жыгып алууга жетишти.

10:21. Бүттү! Шевченко АКШлык атаандашын бетине тээп нокаутка учуратты. Жыйынтыгында беттеш токтотулуп, Кыргыз мушкери чемпиондук курун коргоп калды.

10:28. "Мекеним Кыргыз өлкөсүнө жана бүтүндөй КМШ өлкөлөрүндөгү күйөрмандарыма ыраазычылык билдирем" деген Шевченко лезгинка бийин бийледи.