Аксыда эки айыл өкмөтү бир жайытты талашып жатат

Жалал-Абад облусунун Аксы районунда эки айыл өкмөтү бир жайытты талашып жатат. Бул тууралуу бүгүн, 10-июнда Жогорку Кеңештин Агрардык саясат, суу ресурстары, экология жана регионалдык өнүктүрүү боюнча комитетинин жыйынында депутат Рада Туманбаева билдирди.

Комитет жыйынында “Жайыттар жөнүндө” мыйзамына өзгөртүүлөрдү киргизүү тууралуу” мыйзам долбоору 2-окууда каралды.

"Аксы районунда Кара-Суу жана Үч-Коргон айыл өкмөттөрү бир жайытты талашып жатат. Айылдар жакын жайгашкан, балдар окуган мектеби да бир. Эки айылдын ортосундагы жайыттын талашка түшкөнү боюнча тиешелүү мекемелер чекит коюшу керек", - деди депутат.

Буга өкмөттүн өкүлү: "Бул маселе боюнча 4-июнь күнү жергиликтүү тургундар жана бийлик өкүлдөрүнүн катышуусунда жыйын өткөн. Мыйзам чегинде кандай болуу керектиги айтылып, кеп-кеңештер берилди. Маселе атайын комиссия өкүлдөрүнүн катышуусу менен чечилет", - деди.

“Бул жерде кеп-кеңеш бербей эле, чекит коюп койсоңор болмок”, - деди депутат.