Ошто 3 кызды бычактады делген 20 жаштагы кыз үй камагына чыгарылды

Ош шаарында уруш учурунда 3 кызды бычактоого шектелген 20 жаштагы кыз үй камагына чыгарылды. Бул тууралуу SUPER.KG порталына бүгүн, 10-июнда өздүк булактар билдирди.

Маалыматка ылайык, Ош шаардык соту мындай чечимди 7-июнь күнү чыгарган. Учурда териштирүү иштери жүрүүдө. Ал эми жабыркаган 2 кыз дагы деле ооруканада дарыланууда.

Окуянын чоо-жайына кайрылсак:

Окуя 5-июнда саат 4:10 чамасында Оштогу Кара-Суу көчөсүндөгү үйлөрдүн биринин жанында болгон. Окуяга чейин мушташка катышкан 8 кыз туулган күн белгилеп отурушкан. Кийин алардын биринин тынчын алган башка кыздын үйүнө келишип, ал жерде мушташ болгон. Натыйжада 3 кыз бычактан жаракат алып, ооруканага жеткирилген. Ал эми шектүү 48 саатка камакка алынган.