Алмазбек Атамбаев мас абалында унаа айдап, бир жылга айдоочулук күбөлүгүнөн ажыратылдыбы? Кеңешчиси маалыматты четке какты

"Экс-президент Алмазбек Атамбаев айдоочулук күбөлүгүнөн ажыратылды" деген маалымат Жол кыймылынын коопсуздугун камсыздоо боюнча башкы башкармалыгынын расмий сайтында жайгаштырылды.

Ага ылайык, 2019-жылы 5-майда сот Ж.Аширов Алмазбек Атамбаевди 238/1-берене (мас абалында транспорт каражатын башкаруу) боюнча айыптап, 1 жылга айдоочулук күбөлүгүнөн ажыратты.

SUPER.KG порталына Атамбаевдин коомдук башталыштагы кеңешчиси Кундуз Жолдубаева түшүндүргөндөй, бул маалымат чындыкка дал келбейт. "Биринчиден, 5-Май - бул майрам күнү. Мамлекеттик органдар, алардын арасында соттор бул күнү иштешпейт. Экинчиден, 238-берене бул эски кодекстеги берене. Жаңы кодексте андай жок.

Жол кыймылынын коопсуздугун камсыздоо боюнча башкы башкармалыгына кайрылсак, расмий сайтты бузуп кирүү болгонун айтышты. Демек, колунда бийлик барлардын чагымчылдык аракети жүрүп жатат. Алар жалган маалымат бергени үчүн жоопко тартыларын унутпашы керек", - деди Жолдубаева.

Жол кыймылынын коопсуздугун камсыздоо боюнча башкы башкармалыгынын басма сөз кызматы да Атамбаевди айдоочулук күбөлүктөн ажыратуу жалган маалымат экенин билдирди. "Учурда программисттерибиз бул катанын үстүнөн иштеп жатышат. Ким расмий сайтка мындай маалыматты жайгаштырганын аныктоо иштери жүрүүдө. Мындан улам ал сайттан азырынча алына элек", - дешти SUPER.KG'ге мекемеден.