Базар-Коргондо 19 жаштагы жүргүнчү айдоочуну бычактап салган

Жалал-Абад облусунун Базар-Коргон районунда жүргүнчү катары унаага отурган 19 жаштагы жигит айдоочуну бычактап салган деп шектелүүдө. Бул тууралуу облустук милициядан билдиришти.

Маалыматка ылайык, окуя 9-июнда Базар-Коргон районунда болгон.

"22 жаштагы айдоочунун унаасында 19 жаштагы жаран жүргүнчү катары бара жаткан. Сөздөн сөз чыгып экөө уруша кетишкен. Айдоочу унааны токтотуп, жүргүнчү менен сыртка чыгып сүйлөшмөкчү болгон. Ошол учурда шектүү айдоочуну бычак менен сайып салган. Натыйжада, ал алган жаракатынан улам каза болгон. Бул факты Кылмыштардын жана жоруктардын бирдиктүү реестрине катталып, сотко чейинки өндүрүшкө алынган. Ал эми шектүү кармалып, убактылуу кармоочу жайга киргизилди. Учурда тергөө иштери башталды", - деп билдирет басма сөз кызматы.