Жалал-Абадда 17 жаштагы кызды сабаганга шектелип Камчы Көлбаевдин уюшкан кылмыштуу тобунун "Бульдозер" каймана аттуу мүчөсү кармалды

Жалал-Абад облусунун Сузак районунда уюшкан кылмыштуу топтун мүчөсү колго түштү. Бул тууралуу Жалал-Абад облустук Ички иштер башкармалыгынын басма сөз кызматы билдирди.

Маалыматка ылайык, кармалган адам крим чөйрөдө "Бульдозер" каймана аты менен таанылган 35 жаштагы К.О. ИИМде Камчы Көлбаевдин уюшкан кылмыштуу тобунун мүчөсү катары каттоодо тургандыгы аныкталды.

"Ушул жылдын 17-май күнү Сузак РИИБине Базар-Коргон районунун 36 жаштагы тургуну А.Р. арыз менен кайрылган. Анда 1-май күнү саат 10:30 чамасында 17 жаштагы кызын чала тааныш болгон Сузак районунун Анара аттуу тургуну шериги менен Кара-Дарыя айылындагы адырга алып барып, сабап коюшканын айткан.

Аталган факт Кылмыштардын жана жоруктардын бирдиктүү реестрине катталып, сотко чейинки өндүрүш иши башталган.

Милиция тарабынан жүргүзүлгөн ыкчам иликтөө иш-чараларынын алкагында кылмышка шектүү катары Сузак районунун 1984-жылы туулган К.О. аттуу тургуну кармалды. Ал 2012-жылы "Адам өлтүрүү" беренеси боюнча соттолгону жана Ички иштер министрлигинде каттоодо турган Камчы Көлбаевдин уюшкан кылмыштуу тобунун активдүү мүчөсү, каймана аты "Бульдозер" экендиги белгилүү болду. Учурда катталган кылмыш иши боюнча Сузак РИИБи тарабынан тергөө амалдары жүргүзүлүүдө.

Буга чейин Анара аттуу тургун да кармалып тергөөгө өткөрүлгөн", - деп айтылат маалыматта.