Ысык-Көлдө жайлоодо күйөөсү аялын чабандан кызганып, аны атып салганы айтылууда

Ысык-Көлдө жайлоодо жаран аялын чабандан кызганып, аны атып салган. Бул туралуу социалдык тармактардын бирине Акыл Сатыбалдиев аттуу колдонуучу жазып чыкты.

Маалыматка ылайык, каргашалуу окуя кечээ, 16-июнда болгон.

"Кечээ бизде кайгылуу окуя болду. Күйөөсү аялын малчысынан кызганып мылтык менен атып салыптыр. Деги адамдар эмне болуп баратат?" - деп жазган интернет колдонуучу билдирүүсүндө.

SUPER.KG порталына облустук милициядан саат 16:00 чамасында "тоодон адам өзүн-өзү атып алды" деген билдирүү түшкөнүн жана учурда окуянын чоо-жайы аныкталып жатканын маалымдашты.

"Окуя болгон жер алыс болгондуктан унаа барбайт, байланыш да тартпайт экен. "Өзүн-өзү атып алды" деген билдирүү түшөөрү менен оперативдик топ жөнөп кеткен. Учурда милиция кызматкерлери жеринде иш алып барууда. Кийинчерээк толук маалымат берилет", - деп билдиришти милициядан.