Маурицио Сарри "Ювентус" клубунун башкы машыктыруучусу болуп дайындалды

Англиялык "Челси" клубунун башкы машыктыруучусу Маурицио Сарри италиялык "Ювентус" клубуна өттү. Бул тууралуу "Ювентус" клубунун расмий интернет баракчасы жарыялады.

Маалыматка ылайык, Сарри туриндик клуб менен 3 жылга келишим түзгөн.

"16-июндан тартып клубдун башкы машыктыруучулук милдетин Маурицио Сарри моюнуна алды. Ал бул кызматка 2022-жылдын 30-июнуна чейин дайындалды", - деп жазылат маалыматта.

60 жаштагы машыктыруучу 2013-жылы Италиянын 2-дивизионунда ойногон "Эмполи" клубун жогорку дивизионго алып чыккан. 2015-жылы "Наполи" клубуна өтүп, аталган клубда 2018-жылга чейин эмгектенген. Өткөн жылдын 14-июлунда "Челси" клубунун башкы машыктыруучусу болуп дайындалып, бир жыл ичинде Европа Лигасынын жеңүүчүсү аталды. Англия Премьер-Лигасында "Манчестер-Сити" жана "Ливерпуль" клубдарынан кийинки 3-орунду алып, лондондук клубга келерки жылдагы Чемпиондор Лигасында ойноо укугун алып берди.