Түптө бир туугандар ойноп жатып эски муздаткычтын ичинде камалып, тумчугуп каза болгонун видеого тартып, интернетке чыгарган кызматкер изделүүдө

Ысык-Көлдө 6 жана 4 жаштагы бир туугандар ойноп жатып эски муздаткычтын ичинде камалып, тумчугуп каза болуп калганын видеого тартып интернетке тараткан кызматкер изделүүдө. Бул тууралуу бүгүн, 17-июнда SUPER.KG порталына облустук милициядан билдиришти.

"3-июнь күнү Түп районуна караштуу Михайловка айылында эки баланын өмүрүн алган каргашалуу окуя Кылмыштардын жана жоруктардын бирдиктүү реестрине бөөдө кырсык деп катталды. Учурда ал окуя видеого тартылып, интернетке тарап кеткени боюнча кызматтык иликтөө жүрүүдө. Алдын ала берилген маалыматтарга ылайык, видеону милиция кызматкери тарткан. Иликтөөнүн жыйынтыгы менен чара көрүлөт", - деп билдиришти милициядан.

Окуянын чоо жайына-кайрылсак:

Каргашалуу окуя болгон күнү саат 11:55 чамасында эки бир тууган үйдүн короосунда ойноп жатып дайынсыз жоголуп кетишкен. Мындан улам балдардын ата-энеси милицияга кайрылып, аларды издөө иштери кечке чейин улантылган. Болжол менен саат 17:00дө үйдүн короосунда турган эски муздаткычты ачып көрүшкөндө балдар муздаткычтын ичинде болгон. Алар ойноп жатып муздаткычтын ичине камалып калып, тумчугуп калышкан. Ал муздаткыч сырттан гана ачыла турганы аныкталган.