"Манас" жана Чыңгыз Айтматов улуттук академиясы түзүлдү. Мекеменин вице-президенти болуп Элдар Айтматов дайындалды

"Манас" жана Чыңгыз Айтматов улуттук академиясы мамлекеттик мекемеси түзүлдү. Тиешелүү буйрукка премьер-министр Мухаммедкалый Абылгазиев кол койду. Бул тууралуу өкмөттүн аппаратынын маалымат кызматы билдирди.

Улуттук академияны түзүү 2019-жылдын 31-январында кабыл алынган. Аталган мекеменин президенти Топчубек Тургуналиев, вице-президенти болуп Элдар Айтматов дайындалды.

"Манас" жана Чыңгыз Айтматов улуттук академиясы мамлекеттик мекемесинин уставы бекитилди. Ошондой эле тиешелүү ченемдик-укуктук актыларга жаңы уюмдун ишмердүүлүгүн жөнгө салган өзгөртүүлөр киргизилди.

- "Манас" эпосунда жана Чыңгыз Айтматовдун чыгармачыл мурасында камтылган рухий баалуулуктарды өсүп келе жаткан муун арасында кеңири жайылтуу жана ар тараптуу изилдөө, сактоо, ошондой эле идеяларды дүйнөлүк масштабда жайылтуу, таланттуу манасчыларды тарбиялоо;

- "Манас" эпосунун жана Чыңгыз Айтматовдун маданий мурасын сактоо үчүн шарттарды түзүү. Уюмдун ишмердүүлүгүндө илимий, техникалык жана искусство таануу изилдөөлөрүнө аракеттешүү;

- "Манас" эпосунда, кыргыз элдик эпикалык маданиятында, Чыңгыз Айматовдун чыгармачыл мурасында камтылган рухий, моралдык жана этикалык баалуулуктарды жайылтуу;

- Илимий-практикалык жана илимий-техникалык конференцияларды уюштуруу, өткөрүү жана катышуу;

- Эмгектерди, мезгилдүү басылмаларды жана тематикалык түрмөктөрдү басып чыгаруу;

- Аудио-видео, окутуу-агартуучу, таанып-билүүчү материалдарды даярдоо;

- Көргөзмөлөрдү уюштуруу, сувенирлерди жасап чыгаруу сунушталган.