Талас дарыясына 90 жаштагы улгайган адам түшүп кетти. Чүйдүн Шамшы суусунан 13 жашар өспүрүмдүн жансыз денеси табылды

Талас облусундагы Талас дарыясына 1929-жылы туулган жаран түшүп кетип каза болду. Мындай маалыматты ӨКМнын басма сөз кызматы билдирди.

Маалыматка караганда, окуя 16-июнь күнү катталган. Кең-Арал айылындагы Талас дарыясына 1929-жылы туулган С.З аттуу эркек киши чөгүп кеткендиги тууралуу маалымат түшкөн. Ал күнү туугандары өз алдынча издөө жүргүзүшкөн. Натыйжа чыкпай 17-июнь күнү издөө иш-чараларына ӨКМдан жалпы 20 куткаруучу жардамга барган. Кечээ саат 16:20да маркумдун жансыз денеси куткаруучулар тарабынан табылып, ИИМ кызматкерлерине өткөрүлүп берилген.

Ушундай эле сууга түшүп каза болуу фактысы Чүй облусунда да катталган. ӨКМнын басма сөз кызматынын берген маалыматына караганда, 17-июнь күнү Чүй облусунун Ибраимов айыл аймагынын Шамшы айылындагы Шамшы суусуна 2005-жылы туулган Ш.Б. аттуу эркек бала сууга түшүп кеткендиги тууралуу маалымат түшкөн. Издөө иштеринин натыйжасында бүгүн саат 09:15те өспүрүмдүн жансыз денеси табылып, ИИМ кызматкерлерине өткөрүлүп берилген. Издөө ишине ӨКМдан 5 куткаруучу, ИИМден 15 кызматкер, жергиликтүү тургундардан 35 адам чыгышкан.