Өлкө аймагы боюнча статусу жок 202 айыл бар

Бүгүн, 19-июнда Жогорку Кеңеште "Кыргыз Республикасынын Баткен, Нарын, Ош жана Талас облустарынын айрым калктуу конуштарын айыл категориясына киргизүү жөнүндө" мыйзамдын долбоору экинчи окууда каралды.

Жергиликтүү өз алдынча башкаруу иштери жана этностор аралык мамилелер боюнча мамлекеттик агенттиктин директору Бахтияр Салиев өлкө аймагы боюнча айыл статусу жок 202 айыл бар экенин айтты.

"Айыл статусу жок 202 айыл бар, анын ичинен 36 калктуу конуштарына айыл макам берүү боюнча макулдашуу Жогорку Кеңеште экинчи окууда каралууда. Дагы 16сы боюнча өкмөттүн токтому каралып жатат, бул боюнча да макулдашуудан өткөн. Ошондо бүгүнкү күндө 156 айыл статусу жок калып жатат", - деди Салиев.

Буга депутат Тариел Жоробеков: "Статус ала элек калктуу конуштарга айыл статусун берүүнү эртелетүү керек. Ал жерде жашап жаткан жарандарыбызга шарт түзүп беришибиз абзел. Бул мыйзам долбоорун колдойбуз", - деди.