Мындан 26 жыл мурун цыган улутундагы атасы тарабынан Латвияга уурдалып кеткен Бахтияр апасы менен жолукту

Орусиянын телеканалдарынын биринде көрсөтүлчү "Жди меня" берүүсүнө Бахтияр аттуу жигит кайрылып, Бишкек шаарында жашаган апасын таап берүүгө көмөк көргөзүүнү өтүнгөн.

Бахтияр катында цыган улутундагы атасы ал 1 жашар кезинде Рига шаарына уурдап кеткенин жана ошол бойдон апасын көрө электигин жазган. Көрсөтүү Бахтиярдын апасын жана туугандарын издешип, таап алышкан.

Бахтиярдын апасы Айгүл Осмонова азыркы тапта Кыргыз өлкөсүндө жашайт. Анын айтымында, ал 90-жылдары Рига шаарына барып тигүү цехтеринин биринде эмгектенген. Ал жактан Бахтиярдын атасы менен таанышып, бирге жашап калышкан.

"Көп өтпөй мекениме чогуу кайтып келгенбиз. Анан Бахтияр жарык дүйнөгө келди. Жолдошум экөөбүз жарандык никеде жашачубуз. Ал Ригага кетели деп көп айтчу, бирок мен макул болчу эмесмин. Бир күнү ал баламды уурдап кеткен бойдон кайрылып келген жок. Мен көп жерге кайрылдым, көпчүлүк адамдар өз атасы баласына жамандык кылбайт, бир күнү келет деп сооротуп коюшту. Бахтияр мени издеп жатканын угуп, ага жолукчу күндү күтө берип мага убакыт токтоп калгандай туюлду", - дейт Осмонова.

Ал эми Бахтиярдын айтымында, алгач ал атасы менен жашачу, бирок атасы соттолуп кеткенде чоң апасы менен чоң атасынын колуна барган. Ал кишилердин да көзү өткөн соң балдар үйүндө тарбияланган.

"Балдар үйүнө барганда мага жаңыдан бардык документтеримди жасап беришкен. Азыркы тапта үй-бүлөм бар, 3 баланын атасымын. Атам мага апам каякта экенин, эмне болуп ажырашып жана ал кантип мени уурдап кеткенин айтып берген. Анын айтымында, апам жашаган аймактын салты менен мени сүннөткө отургузушмак болгондо ал мени уурдап кеткен", - дейт Бахтияр.